पोखरा । एनएसएलमा काठमाडौं बाहिरिए सगैं एफसी चितवन पहिलो पटक नेपाल सुपर लिग एनएसएल को प्लेअफमा पुगेको छ । बिहीबार भएको अन्तिम लिग खेलमा साविक उपविजेता समेत रहेको धनगढी एफसीलाई ३–१ ले पराजित गर्दै चितवनले प्लेअफमा स्थान बनाएको छ ।
तेस्रो संस्करणमा चितवन प्लेअफ पुग्ने अन्तिम टोली बनेको छ । यसअघि नै साविक विजेता ललितपुर सिटी एफसी, साविक उपविजेता धनगढी एफसीसँगै पोखरा थण्डर्सले प्लेअफमा स्थान बनाइसकेको छ ।
अन्तिम लिग खेल जितपछि चितवनले ६ खेलबाट १० अंक जोड्दै तेस्रो स्थानमा उक्लेको छ । पहिलो पटक प्लेअफमा पुगेको चितवनले अब एलिमिनेटरमा पोखरा थण्डर्ससँग प्रतिस्पर्धा गर्नेछ ।
धनगढीको यस सिजन लगातार ५ खेलको जित यात्रामा पनि ब्रेक लागेको छ । यसअघि नै पहिलो क्वालिफायर खेल्ने पक्का भएको धनगढीले अन्तिम लिगमा चितवन विरुद्ध दोस्रो रोजाईँको टिम मैदान उतारेको थियो ।
शनिवार ललितपुरसँगको खेलअघि धनगढीले सबै खेलाडीलाई मौका दिने क्रममा दोस्रो र तेस्रो रोजाईँको किपरलाई समेत चितवन विरुद्ध खेलाएको थियो ।
हारपछि धनगढीले ६ खेलबाट ११ अंक जोडेर दोस्रो स्थानै रह्यो । अब पहिलो क्वालिफायर ललितपुर र धनगढीबीच शनिवार हुनेछ ।
दशरथ रंगशालमा चितवनले एक गोलले पछि परेको स्थिती उल्टाउदै पुनरागमन जित हात पारेको हो ।
