भियना — नेपालका राजदूत भरतकुमार रेग्मीले अस्ट्रियन कफी एण्ड टी एसोसिएसनकी प्रबन्ध निर्देशक सुश्री टीना एन्टोनियससँग भेटवार्ता गरी नेपालमा उत्पादन हुने जैविक तथा उच्च गुणस्तरीय कफीलाई अस्ट्रियासहित युरोपको बजारमा विस्तार गर्ने सम्भावनाबारे छलफल गर्नुभएको छ।
राजदूत रेग्मी र सुश्री एन्टोनियसबीच भएको भेटमा नेपाली कफीको उत्पादन, गुणस्तर, अन्तर्राष्ट्रिय बजारमा यसको बढ्दो सम्भावना तथा युरोपका उपभोक्तामाझ नेपाली कफीको पहुँच विस्तार गर्ने उपायहरूबारे महत्वपूर्ण विचार आदान–प्रदान भएको थियो।
नेपाल प्राकृतिक सम्पदा, जैविक विविधता र भौगोलिक विशेषताले सम्पन्न मुलुक हो। नेपालको पहाडी क्षेत्रको उचाइयुक्त भू–भाग, अनुकूल हावापानी र प्राकृतिक वातावरणमा उत्पादन हुने कफीले आफ्नो मौलिक स्वाद, सुगन्ध र गुणस्तरका कारण अन्तर्राष्ट्रिय बजारमा छुट्टै पहिचान बनाउन थालेको छ।
विशेषगरी नेपाली किसानहरूले उत्पादन गर्दै आएको जैविक कफी वातावरणमैत्री खेती प्रणाली, प्राकृतिक उत्पादन प्रक्रिया र गुणस्तरीय प्रशोधनका कारण विश्व बजारमा सम्भावनायुक्त उत्पादनका रूपमा हेरिएको छ। पछिल्लो समय विश्वभर उपभोक्ताहरू वातावरण संरक्षण, दिगो उत्पादन र स्वास्थ्यप्रति सचेत बन्दै गएकाले जैविक तथा गुणस्तरीय कफीको माग निरन्तर बढिरहेको छ।
भेटका क्रममा नेपाली जैविक कफीलाई युरोपको बजारमा कसरी प्रभावकारी रूपमा पुर्याउन सकिन्छ, यसको बजार प्रवर्द्धन, वितरण सञ्जाल, सम्भावित व्यापारिक सहकार्य तथा नेपाली उत्पादकहरूलाई अन्तर्राष्ट्रिय बजारसँग जोड्ने विषयमा छलफल भएको थियो।
अस्ट्रिया कफी संस्कृतिका लागि परिचित मुलुक हो। यहाँ गुणस्तरीय र विशेष पहिचान भएका कफीप्रति उपभोक्ताको रुचि रहेको अवस्थामा नेपालबाट उत्पादन हुने जैविक कफीले युरोपको बजारमा राम्रो सम्भावना बोकेको छ। उचित बजार व्यवस्थापन, प्रचार–प्रसार र व्यापारिक सहकार्यका माध्यमबाट नेपाली कफीलाई अन्तर्राष्ट्रिय स्तरमा थप स्थापित गर्न सकिने विश्वास गरिएको छ।
भेटका क्रममा राजदूत रेग्मीले नेपाली कफी उत्पादक तथा किसानहरूले उत्पादन गर्दै आएको गुणस्तरीय कफीलाई अन्तर्राष्ट्रिय बजारसम्म पुर्याउन आवश्यक सहकार्य र पहलको महत्वबारे जोड दिनुभएको थियो।
सुश्री टीना एन्टोनियसले पनि नेपाली कफीको सम्भावना, गुणस्तर र बजार विस्तारका विषयमा सकारात्मक चासो व्यक्त गर्नुभएको थियो। उक्त भेटले नेपाल र अस्ट्रियाबीच चिया तथा कफी व्यापारको क्षेत्रमा सहकार्यका नयाँ सम्भावना पहिचान गर्न सहयोग पुगेको छ।
नेपाली जैविक कफीलाई युरोपको बजारमा स्थापित गर्न गरिएका यस्ता पहलहरूले नेपाली किसान, उत्पादक तथा निर्यात व्यवसायीहरूका लागि नयाँ अवसर सिर्जना गर्ने र नेपालको कृषि उत्पादनलाई अन्तर्राष्ट्रिय बजारमा थप पहिचान दिलाउने अपेक्षा गरिएको छ।
